Netsvikarar herja á Nordea-bankann

Rússneskir netþrjótar hafa stolið jafnvirði 72 milljóna íslenskra króna af reikningum viðskiptavina sænska bankans Nordea, eins stærsta banka á Norðurlöndunum, síðan í haust í fyrra. Fjöldi manns hefur verið handtekinn vegna málsins, þar af rúmlega 100 manns sem tengjast því í Svíþjóð.

Tímaritið Business Week segir þrjótana hafa sent viðskiptavinum bankans póst sem leit út fyrir að vera frá bankanum. Í póstinum var hlekkur og sagt að ef smellt yrði á hann myndu viðskiptavinirnir hala niður þjófavörn, sem bankinn hefði komið sér upp. Í staðinn höluðu viðskiptavinirnir niður hugbúnaði, sem afritaði lykilorð viðskiptavinanna inn á netreikning þeirra í bankanum.

Fyrstu svikin munu hafa átt sér stað í ágúst í fyrra og hafa nú um 250 viðskiptavinir Nordea-bankans orðið fyrir barðinu á svikum af þessu tagi.

Talsmaður Nordea-bankans segir bankann hafa bætt viðskiptavinum skaðann að fullu og bendir á að sænsku lögreglunni hafi tekist að rekja slóð svikapóstsins til Rússlands og handtekið fjölda manns.

Að sögn talsmannsins eru netsvik sem þessi afar tíð og leitar bankinn allra leiða til að auka öryggi í netbankaviðskiptum.