Feitir fastir í metorðastiganum

Niðurstöður könnunar sem gerð var í Bretlandi á síðasta ári benda til að þeir sem eru yfir kjörþyngd séu ólíklegri til frama innan veggja fyrirtækja en þeir sem eru um eða undir kjörþyngd.

Í könnuninni, sem breska ráðgjafafyrirtækið The Aziz Corporation stóð fyrir, birtast ýmsir fordómar í garð þeirra sem eiga í baráttu við aukakílóin. Þar á meðal eru tveir þriðju hlutar yfirmanna í Bretlandi vissir um að þeir sem eigi við offituvandamál að stríða séu fórnarlömb fordóma og festist í metorðastiganum þegar stöðuhækkanir koma til tals. Stjórnarmaður ráðgjafafyrirtækisins, segir niðurstöðurnar benda ótvírætt til þess að útlit skipti miklu máli á framabrautinni. Þar skipi líkamsþyngd og útlit veigamikinn sess.

Í rannsókninni kom meðal annars fram að 70 prósent stjórnenda í fyrirtækjum telji að þeir sem eru yfir kjörþyngd búi yfir litlum sjálfsaga. Þá telja 67 prósent að feita starfsmenn skorti þol og kraft til að takast á við daglegt amstur af sama alefli og grennri starfsmenn.

„Auðvitað geta stjórnendur fyrirtækja ekki gengist við fordómum sínum og rætt um þá opinskátt enda eiga þeir þá á hættu að vera kærðir,“ segir stjórnarformaðurinn.