Sjö vikur án viðskipta

Engin viðskipti hafa átt sér stað á hinum nýja iSEC-markaði Kauphallar Íslands. Opnað var fyrir viðskipti á markaðnum þriðja júlí síðastliðinn. Hampiðjan er enn sem komið er eina félagið á markaðnum.

Haraldur Pétursson, sérfræðingur KB banka, segir iSEC-markaðinn ágætis hugmynd sem komið hafi fram á röngum tíma. "Þetta snýst náttúrulega allt saman um peninga og ef að þeir fást ekki er betra að einfaldlega bíða þar til rætist úr. Hugmyndin er alls ekkert dauðadæmd, sérstaklega ef ástand markaða batnar eins og við reiknum með að gerist nú í haust og vetur."

iSEC-markaðurinn er einkum ætlaður sprotafyrirtækjum og eru skráningarskilyrði ekki jafn ströng og á aðallista Kauphallarinnar. Upphaflega stóð til að opna markaðinn skömmu eftir síðustu áramót en tafir urðu á.

Mörg fyrirtæki hafa verið orðuð við skráningu; þeirra á meðal 3-Plús og CCP. Þá hugði íslensk-bandaríska líftæknifyrirtækið Cyntellect á skráningu en varð frá að hverfa í kjölfar misheppnaðs hlutafjárútboðs.

Þórður Friðjónsson, forstjóri Kauphallarinnar, segir að vissulega hafi menn gert sér vonir um kraftmeiri gang hins nýja markaðar. Hins vegar sé engin ástæða til að örvænta; enda eðli smærri markaða að velta sé lítil. "iSEC er spennandi kostur fyrir ung vaxandi fyrirtæki í leit að fjármagni. Við teljum það skyldu okkar og hlutverk að bjóða fyrirtækjum þennan kost."

HB Grandi hefur þegar verið afskráð af aðallista Kauphallarinnar og hyggur á skráningu á iSEC-markaðinn annan október. Þórður býst við fimm til tíu félögum til viðbótar á næstu tveimur misserum. "Við teljum það bara tímaspursmál hvenær iSEC-markaðurinn tekur við sér."