Tap fyrir Svíum

Íslenska landsliðið tapaði 2-1 fyrir Svíum í undankeppni EM á Laugardalsvelli í kvöld eftir að staðan hafði verið jöfn í leikhléi 1-1. Íslenska liðið var mun sterkari aðilinn í síðustu mínúturnar og átti Eiður Smári Guðjohnsen meðal annars skot í slá sænska marksins.

Arnar Þór Viðarsson kom íslenska liðinu yfir á 6. mínútu leiksins með glæsilegu vinstrifótarskoti utan teigs. Íslenska liðið var vart hætt að fagna þegar Kim Kallström jafnaði leikinn með þrumufleyg af 40 metra færi beint úr aukaspyrnu. Það var svo Christian Wilhelmsson sem skoraði sigurmarkið eftir um klukkustundar leik. Íslenska liðið tók öll völd á vellinum eftir það, en vörn Svía hélt og niðurstaðan þriðja tap íslenska liðsins í röð í riðlinum.