Markaðsaðilar setji sér reglur

Viðskiptaráð telur skynsamlegra að eftirláta markaðsaðilum að setja sér eigin reglur og framfylgja þeim en að láta það í hendur hins opinbera sem myndi hafa eftirlit með fjármagnsmarkaði.

Bestu leiðina til að meta hvort rétt sé að gefa fjármagnseigendum aukið frelsi til að setja sér reglur sé að kanna hvernig reynslan hafi verið af slíku frelsi hérlendis sem erlendis. Þar sem reynslan af því sé góð er vandséð að nokkuð sé að vanbúnaði að halda áfram á þeirri braut, að sögn Viðskiptaráðs.

Í skoðun Viðskiptaráðs í gær kemur fram að höftum og bönnum hafi verið aflétt af viðskiptalífi og fjármagnsmarkaði vestrænna ríkja. Hafi það skapað víðara svigrúm en áður hafi þekkst. Þrátt fyrir þetta hafi regluverkið aldrei verið flóknara, að mati Viðskiptaráðs, sem ásamt Samtökum atvinnulífsins og Kauphöll Íslands gaf út leiðbeiningar um stjórnarhætti fyrirtækja fyrir þremur árum. Var mat aðilanna að þeir væru betur í stakk búnir að setja hóflegar og réttlátar reglur en löggjafinn.

Að sögn Viðskiptaráðs er komin reynsla á leiðbeiningarnar og virðist hún hafa verið góð. Þá hafi löggjafinn gefið þegjandi vottorð um að þetta fyrirkomulag hafi gefist vel enda hafi hann ekki sett lög um efnið.