Ríkisendurskoðandi rannsaki rekstur Byrgisins

Félagsmálaráðuneytið hefur farið fram á það við Ríkisendurskoðanda að hann taki til skoðunar rekstur meðferðarheimilisins Byrgisins. Háttsettir aðilar í þjóðfélaginu, þar á meðal þingmenn og ráðherrar, hafa fengið nafnlaust bréf með alvarlegum ásökunum á hendur forstöðumanni Byrgisins.

Í bréfinu lýsir einstaklingur sem kallar sig Lot hvernig fénu sem Byrgið fær úr ríkissjóði er sólundað. Það var sent til háttsettra manna í samfélaginu, meðal annars til alþingismanna og ráðherra í lok október. Bréfritari segir sig knúinn til að skrifa bréfið og upplýsa þannig um hina miklu spillingu og óreiðu sem fram fari í Byrginu. Síðan koma langar lýsingar á því sem bréfritari telur styðja þessar ásakanir.

Um þátt Guðmunds Jónssonar, forstöðumanns Byrgisins segir orðrétt: Það sem ríkið styrkir Byrgið um, mánaðarlega fer beint í hanns vasa og lítið fer til rektsturs Byrgisins. Fénu er sólundað.Að lokum segist bréfritari treysta því að viðtakandi geri eitthvað í málinu.

Félagsmálaráðherra hefur nú beðið Ríkisendurskoðanda um að skoða rekstur Byrgisins. Frá árinu 1999 hefur ríkissjóður veitt Byrginu fjárstuðning og í ár nam styrkurinn rúmum 28 milljónum króna auk þess sem rikissjóður greiðir húsaleigu fyrir Byrgið að fjárhæð 9 milljónir. Því má gera ráð fyrir því að á þessum árum hafi ríkið styrkt Byrgið um hátt í 200 milljónir króna.

Í bréfi félagsmálaráðherra til ríkisendurskoðanda sem fréttastofa hefur nú undir höndum kemur fram að ástæðan fyrir beiðni sinni sé sú að gert hafi verið ráð fyrir slíkri endurskoðun næsta vor og að alþingismenn hafi ítrekað sýnt því áhuga hvernig fjárstuðningi ríkisins er varið af hálfu Byrgisins.

Fyrirmyndin að dulnefni bréfritarans er biblíupersónan Lot sem var bróðursonur Abrahams. Hann var leiddur af englum út úr Sódómu rétt áður en borginni var eytt vegna lastafulls lífernis íbúanna. Kona Lots varð að saltstólpa er hún leit til baka í átt til borgarinnar á flóttanum.