Rændur og barinn af þjófum í Róm

Dino Zoff, fyrrum fyrirliði ítalska landsliðsins í knattspyrnu, lenti í óskemmtilegri lífsreynslu þegar hann var á göngu með konu sinni í Róm á laugardagskvöldið. Óprúttnir náungar höfðu af þeim öll þeirra verðmæti og gáfu Zoff  um leið vænt glóðurauga.

Zoff, fyrrum markvörður, var ekki á því að láta undan vilja ræningjanna og varðist í fyrstu af kjafti og klóm. Hann réð þó ekki við ræningjana, sem voru fjórir talsins, og komu þeir nokkrum vænum höggum á Zoff áður en markvörurinn fyrrverandi lét undan. Zoff meiddist ekki alvarlega en hlaut þó vænt glóðurauga og nokkrar skrámur í andliti.

Hjónin létu þá á endanum fá úrin sín, farsíma og veski, sem innihéldu samtals um 1000 evrur. Ræningjarnir hafa ekki fundist.