Ætlar að spila aftur fyrir Rangers

Gennaro Gattuso hjá AC Milan segist ákveðinn í að spila aftur með liði Glasgow Rangers á ný áður en hann leggur skóna á hilluna, en þessi magnaði miðjumaður var aðeins 19 ára gamall þegar Walter Smith keypti hann frá Perugia á sínum tíma og gaf honum tækifæri með Rangers.

Gattuso segist eiga óuppgerða hluti í Glasgow, en Dick Advocaat lét hann fara frá Rangers árið 1998 þegar hann ætlaði að byggja liðið upp á stórstjörnum. Gattuso er giftur skoskri konu og segist klárlega ætla að spila aftur í Skotlandi eftir að samningur hans við Milan rennur út árið 2011.

"Ég ræddi við forráðamenn Rangers í sumar og ég er ekki sáttur við það hvernig ferli mínum lauk þar á sínum tíma. Ég fór ekki út um aðaldyrnar, heldur var flæmdur út um bakdyrnar snemma morguns og það hefur skilið eftir óbragð í munninum á mér. Ég mun ekki fara til Rangers til að slappa af og ætla ekki að fara þangað þegar ég verð orðinn útbrunninn - ég vil fara þangað og hafa eitthvað að gefa liðinu bæði í deild og Evrópu. Ég vil fara aftur til Rangers til að sýna fólki að það var ekki staðið vel að því hvernig ég var flæmdur í burtu og stuðningsmenn liðsins hjálpuðu mér að komast þangað sem ég er í dag - og því eiga þeir inni hjá mér að ég komi aftur," sagði þessi magnaði miðjumaður.