Juventus mætir Rimini í fyrsta leik

Í dag var loksins gefin út leikjaniðurröðun í ítalska boltanum, en miklar tafir hafa orðið á því í kjölfar knattspyrnuskandalsins sem tröllriðið hefur Ítalíu í sumar. Stórlið Juventus spilar sinn fyrsta leik í B-deildinni á útivelli 9 september gegn smáliði Rimini sem var í fallbaráttu í deildinni á síðustu leiktíð.

Forráðamenn Juventus hafa enn ekki gefist upp í baráttu sinni um að koma liðinu aftur í A-deildina, svo þessi leikjaniðurröðun er ekki endanlega staðfest. Keppni í A-deildinni hefst einnig þann 9. september þar sem meistarar Inter sækja Fiorentina heim, en Fiorentina byrjar með 19 stig í mínus í deildinni. Roma tekur á móti Livorno þennan sama dag og daginn eftir mætast hin liðin sem dæmd voru fyrir þáttöku sína í skandalnum, Lazio og AC Milan, sem hefja leik með mínus átta og mínus ellefu stig.