Tap fyrir Hollandi

Íslenska landsliðið í körfuknattleik tapaði naumlega fyrir því hollenska í fyrsta leik sínum á æfingamóti í Hollandi í gærkvöldi. Hollendingar tryggðu sér 94-91 sigur með þriggja stiga skoti um leið og leiktíminn rann út. Brenton Birmingham var stigahæstur í íslenska liðinu með 20 stig, Magnús Þór Gunnarsson skoraði 15 stig og Jakob Sigurðarson skoraði 13 stig.

Jón Arnór Stefánsson var ekki með íslenska liðinu í gær, en kemur væntanlega inn í hópinn í kvöld þegar liðið mætir Belgum. Belgar töpuðu naumlega fyrir Svíum á mótinu í gær. Þá er óvíst um þáttöku Brenton Birmingham í leik kvöldsins eftir að hann fékk högg á hnéð í leiknum við Hollendinga í gær.