Föroya Sparikassi skilar metafkomu

Föroya Sparikassi Group, sem er stærsti stofnfjáreigandinn í SPRON, skilaði methagnaði á fyrra hluta ársins. Nam hagnaður bankans um 122 milljónum danskra króna, eða 1,5 milljörðum króna. Þetta er nánast jafn mikill hagnaður og bankinn skilaði allt árið í fyrra.

Stjórnendur Sparikassans reikna með að hagnaður bankans á árinu verði um 2,8 milljarðar króna fyrir skatta.

Af einstökum tekjuliðum hækkuðu þóknunartekjur mest milli ára eða um 92 prósent. Hreinar rekstrartekjur bankans voru 2,7 milljarðar króna. Stór hluti af tekjum Sparikassans koma nú frá dönsku dótturfélögunum EIK Bank og Ejendomsvækst. Bankinn fékk einnig 165 milljónir króna í arð frá SPRON.

Eigið fé Sparikassans er nú í fyrsta skipti komið yfir einn milljarð danskra króna og eignir yfir tíu milljarða danskra króna sem gera 120 milljarða króna.

Föroya Banki, hinn stóri viðskiptabankinn í Færeyjum, hagnaðist um 460 milljónir króna á fyrri hluta ársins sem er 35 prósenta minni hagnaður en á sama tíma í fyrra.

Eignarhald í færeysku bönkunum er á fárra hendi. Sparikassagrunnurinn, sem er sjálfseignarstofnun, á fjóra fimmtu hluta bréfa í Sparikassanum en níu þúsund fjárfestar um fimmtung. Yfir 99 prósent hlutafjár í Föroya Banki er í eigu færeysku landsstjórnarinnar.

Stjórnendur Sparikassans hafa lýst yfir áhuga sínum að skrá félagið í Kauphöll Íslands árið 2007 og nú er unnið að einkavæðingu Föroya banki.