Vorblót Ögmundar

FjármálafyrirtækiÞingmaðurinn Ögmundur Jónasson boðar fagnaðarerindi vinstri manna á heimasíðu sinni. Þar talar einn af leiðtogum stjórnarandstöðunnar og skrif hans hljóta því að hafa nokkuð vægi. Á dögunum var að finna skýr skilaboð til starfsmanna íslenskra fjármálafyrirtækja þar. Þar sagði hann meðal annars: "Misskipting og ranglæti þrífst og breiðir úr sér sem aldrei fyrr. Spurningin er þá eftirfarandi: Er jafnaðarsamfélaginu fórnandi fyrir 12 milljarða og nokkra stráka og stelpur í silkigöllum; þotuliðið? Eða eigum við að snúa spurningunni við: Er þotuliðinu fórnandi fyrir meiri jöfnuð og félagslegt réttlæti? Mitt svar er játandi,"

Því miður fylgdu yfirlýsingum þingmannsins ekki nánari útlistanir á því hvernig þessi fórnarathöfn ætti að fara fram. En hvort sem hann hefur í huga skattaþvinganir, ríkisvæðingu eða önnur kunnug verkfæri sósíalista, eru orð þingmannsins áminning um það sem koma skal ef vinstri öflin ná yfirtökunum eftir kosningarnar í vor: Það verður gerð atlaga að frjálsu framtaki í landinu.

Varla ætti vera þörf á að minna á að fjármálafyrirtækin og starfsmenn þeirra greiða árlega tugi milljarða í sameiginlega sjóði. Afraksturinn af rekstri bankanna meðan þeir voru undir forsjá ríkisins voru smámunir í samanburðinum. Að auki leggja bankarnir hundruð milljóna til menningar- og mannúðarmála árlega. En þetta skiptir Ögmund engu máli, því þotuliðinu er fórnandi.

Fjármálafyrirtækin eru líka eftirsóttur vinnuveitandi fyrir vel menntað og metnaðarfullt ungt fólk. Þau hafa t.a.m. opnað ný tækifæri fyrir Íslendinga sem stundað hafa langskólanám á erlendri grundu. Og vissulega er þeim umbunað fyrir vel unnin störf, en það er líka nauðsynlegt til þess að íslensku fyrirtækin geti haldið í úrvals starfsfólk í alþjóðlegu umhverfi. En Ögmundur gefur lítið fyrir þessi nýju tækifæri fyrir ungt fólk á Íslandi, hann varðar ekkert um "nokkra stráka og stelpur í silkigöllum" sem standa í vegi fyrir framtíðarlandi félagshyggjunnar. Þeim er fórnandi!

Það er full ástæða til þess að halda þessum orðum Ögmundar til haga, þau gefa einstaka innsýn í hugarheim íslenskra vinstri manna. Hagnaður og gróði er eitur í þeirra beinum " jafnvel þótt samfélagið í heild njóti ávaxtanna í aukinni skattheimtu og velmegun. Sæl er sameiginleg eymd gæti allt eins verið kjörorðið. Krakkanir í silkigöllunum þurfa því ekki að ganga að því gruflandi hvernig þeim mun reiða af í vor ef Ögmundur og félagar hans í stjórnarandstöðunni ná settu marki. Þau verða fyrsta fórn vorblótsins.

Höfundur gefur kost á sér í 5. sæti á lista Sjálfstæðisflokksins í SV-kjördæmi.