Flugeldar gleðja augað...

Nú styttist óðum í áramótin. Flugeldasölustaðir hafa verið opnaðir og einstaklingar farnir að huga að flugeldum, sérstaklega karlpeningurinn og skiptir litlu á hvaða aldri þeir eru. En þessi tími er ekki hættulaus. Ef ekki er farið eftir leiðbeiningum um meðferð flugelda geta orðið slys og því miður höfum við séð nokkur slík hver áramót.

Dagana fyrir og eftir áramótin sjálf eru þeir sem slasast oftast drengir sem eru að fikta við að breyta flugeldunum þ.e. búa til sínar eigin sprengjur og/eða taka kökur í sundur. Um áramótin sjálf eru það hins vegar fullorðnir karlmenn sem eru í mestri hættu.

Börn yngri en 12 ára mega ekki kaupa neinar flugeldavörur en unglingar á aldrinum 12 til 16 ára mega þau kaupa einstakar vörutegundir sem taldar eru hættulausar eða hættulitlar sem og vörur sem ætlaðar eru til notkunar innanhúss. Þegar slíkar vörur eru notaðar samkvæmt leiðbeiningum ættu þær ekki að valda meiðslum á fólki sem stendur í eins metra fjarlægð eða meira frá þeim, né valda skemmdum á eignum. Foreldrar verða að vera meðvitaðir um þá hættu sem fylgja flugeldum og vita hvað börn þeirra eru að fást við á þessum tíma. Börn eiga ekki að umgangast flugeldavörur, með einum eða öðrum hætti, nema undir eftirliti fullorðinna.

Flugelda verður að geyma á þurrum stað, þar sem börn geta ekki nálgast þá og ekki er mælt með að geyma þá milli ára. Þegar skotið er upp á að geyma flugeldana fjarri þeim stað sem skotið er upp á og aldrei skal geyma flugeldavörur í vösum.

Ákveðnar almennar reglur gilda þegar verið er að skjóta upp, sama hvers kyns flugelda er um að ræða. Skjóta verður flugeldavörum upp á opnu svæði og áhorfendur eiga að standa vindmegin við skotstað. Hendur þess sem skýtur upp eru best varðar ef viðkomandi er í hönskum. Flugeldagleraugu eiga allir að nota, sama hvort þeir eru að skjóta upp eða bara að horfa á. Aldrei má halla sér yfir flugeldavörur sem eldur er borinn að, tendra skal á kveiknum með útréttri hendi og víkja strax frá. Ef flugeldur springur ekki skal hella vatni yfir hann, en ekki reyna að kveikja aftur í honum. Gætið barna vel, þau þekkja hætturnar ekki eins og þeir fullorðnu og munið að áfengi og flugeldar fara aldrei saman. Megið þið eiga ánægjuleg og slysalaus áramót.