Afastelpa á Þing

PrófkjörBryndís Haraldsdóttir tekur þátt í prófkjöri Sjálfstæðismanna í Suðvesturkjördæmi, hún stefnir á 4-5 sæti.

Hver er Bryndís og hverra manna er hún? Foreldrar eru Hafdís Rúnarsdóttir hjúkrunarfræðingur og ljósmóðir sem starfar á Sjúkrahúsinu á Akranesi og Haraldur Pálsson sem starfar við öryggisgæslu á Landspítalnum. Hún á fósturföður Karl Friðriksson framkvæmdastjóra hjá Iðntæknistofnun. Móðurafi er undirritaður og móðiramma er Guðrún Hafliðadóttir eða Dunna fjölskylduráðgjafi hjá SÁÁ í aldarfjórðung og fyrsti heiðursfélagi í Félagi Áfengisráðgjafa. Föðurafi var Páll Skúli Halldórsson kaupsýslumaður í Reykjavík og föðuramma er Guðrún, kölluð Rúrí lyfjatæknir. Fósturafi var Friðrik Karlsson kendur bæði við bæinn Hrísa í Húnavatnslyslu og Domus Medica. Hann sá um byggingu Domus og var framkvæmdastjóri þess í fjöldamörg ár, fósturamma var Guðrún Pétursdóttir, annáluðu sauma og hannyrðakona í Reykjavík.

Bryndís heitir eftir móðir minni og finnst mér að hún hafi hún hafi erft margt frá henni eins og háralitinn og þessa rósemi og hæglæti sem einkennir svo mjög fas hennar. Hún var mjög feimið barn en læknaðist af feimninni þegar hún níu ára var með okkur hjónunum á McDonalds veitingastað í London. Hana langaði í ís og sagði ég henni að hún yrði að fara í biðröðina sjálf og kaupa ísinn og sagði henni hvað hún ætti að segja á ensku. Henni leist ekki á blikuna en lét tilleiðast og það var aldeilis hróðug stelpa sem kom til baka með ísinn sinn. Í dag er Bryndís 29 ára gömul hún er af þessari nýju kynslóð ungra kvenna sem er að hasla sér völl í atvinnulífinu en er um leið eiginkona og móðir. Jafnframt því að vera varaþingmaður starfar hún sem verkefnisstjóri Evrópuverkefna hjá Impru, nýsköpunarmiðstöð á Iðntæknistofnun, en hún lauk B.Sc. gráðu í alþjóðamarkaðsfræði við Tækniskóla Íslands árið 2001. Hún býr í Mosfellsbæ ásamt eiginmanni sínum Örnólfi Örnólfssyni rafvirkjameistara þau eiga tvö börn og ætla að bæta því þriðja við í lok janúar á næsta ári.

Bryndís hefur brennandi áhugi á að starfa að framgangi sjálfstæðisstefnunnar þar sem frelsi einstaklingsins er í hávegum haft svo og jöfn tækifæri allra til að þroska og nýta hæfileika sína. Hún telur mikilvægt að Sjálfstæðisflokkurinn fái góða kosningu á komandi vori svo tryggt sé að Sjálfstæðisflokkurinn haldi áfram því mikilvæga starfi að tryggja öryggi og velferð íslensks þjóðfélags. Bryndís er tilbúin að leggja sitt af mörkum til að svo megi verða. Bryndís hefur verið varaþingmaður Sjálfstæðisflokksins í Suðvesturkjördæmi á yfirstandandi kjörtímabili og komið inn á þing í forföllum Þorgerðar Katrínar. Hún hefur verið varabæjarfulltrúi í Mosfellsbæ frá árinu 2002 og setið í fjölda ráða og nefnda á vegum flokksins. Bryndís hefur starfað mikið innan ungliðahreyfingarinnar og setið í stjórn SUS. Ég hvet alla sjálfstæðismenn í Suðvesturkjördæmi að veita Bryndísi brautargengi í 4-5 sæti í prófkjörinu, það verður engin svikin af því.

Höfundur er sálfræðingur og fyrrverandi flugstjóri.