Glitnir lýkur endurfjármögnun fyrstur

Glitnir hefur lokið allri endurfjármögnun vegna ársins 2007, fyrstur íslensku bankanna. Á árinu hefur bankinn gefið út skuldabréf að jafnvirði um 270 milljarða króna á árinu.

Skuldir Glitnis með gjalddaga á næsta ári voru um 242 milljarðar króna. Í tilkynningu frá bankanum segir að vegna sterkrar lausafjárstöðu hafi bankinn keypt hluta útgefinna skuldabréfa til baka og eigi nú lausafé til að mæta öllum gjalddögum skulda næsta árið.

Fram kemur að Glitnir hafi lagt mikla áherslu á að styrkja lausafjárstöðu bankans til að tryggja endurfjármögnun næsta árs. Sú vinna hafi gengið mjög vel við óstöðugar markaðsaðstæður. Handbært fé Glitnis nemur nú 225 milljörðum króna, eða 111 prósent fjármögnunarþarfar næsta árs.

Við munum nýta okkur þau tækifæri sem liggja í sterkri lausafjárstöðu okkar til frekari vaxtar, sagði Tómas Kristjánsson framkvæmdastjóri fjármálasviðs Glitnis.