Mesti hagnaður í sögu Glitnis

Glitnir skilaði methagnaði á öðrum ársfjórðungi, þegar bankinn hagnaðist um ellefu milljarða króna. Þetta er mesti hagnaður í sögu bankans á einum ársfjórðungi.

Samanlagður hagnaður bankans á fyrri árshelmingi nemur því 20,1 milljarði króna og er hann eini bankinn sem bætti hagnað frá frá fyrsta ársfjórðungi.

Arðsemi eigin fjár um 46 prósent á sama tíma sem er hærri arðsemi en hjá hinum viðskiptabönkunum.

Afkoma bankans er langt umfram væntingar markaðsaðila sem höfðu reiknað með sjö til átta milljarða hagnaði á fjórðungnum.

Glitnir er aukinheldur eini viðskiptabankinn sem jók hreinar rekstrartekjur á milli fyrsta og annars ársfjórðungs og má segja að þar hafi legið spáskekkja markaðsaðila. Námu þær alls 18,6 milljörðum og hækkuðu um rúm sjö prósent frá fyrsta ársfjórðungi. Hreinar vaxtatekjur voru 11,5 milljarðar króna á fjórðungnum, sem er helmingur af öllum vaxtatekjum ársins í fyrra, og jukust þær um 3,5 milljarða króna frá fyrsta árshluta eða um 45 prósent. Þjónustutekjur námu 5,9 milljörðum og hækkuðu lítillega frá fyrsta ársfjórðungi.

Fjárfestingartekjur og aðrar tekjur námu rúmum einum milljarði króna á fjórðungnum en voru um 3,7 milljarðar á fyrsta árshluta.

Undir aðrar tekjur fellur meðal annars söluhagnaður af þriðjungshlut íSjóvá-Almennum upp á 2,4 milljarða króna.

Rekstrargjöld námu tæpum 6,7 milljarði og hækkuðu um fjórtán prósent á milli fjórðunga.

Eignir Glitnis voru 2.023 miljarðar króna í lok júní og höfðu aukist um 551 milljarð frá áramótum. Eigið fé bankans var 126 milljarðar.