Lítill ójöfnuður í launum

Mismunur milli tekna ákveðinna launahópa hefur ekki aukist hér á landi undanfarinn áratug. Vægi fjármagnstekna hefur hins vegar margfaldast og safnast þær á fárra hendur. Þetta sýna nýir útreikningar Benedikts Jóhannessonar, framkvæmdastjóra Talnakönnunar.

Benedikt hefur reiknað út svokallaðan Gini-stuðul sem er mælikvarði á jöfnuð í launum. Því nær núlli sem stuðullinn er, því meiri er jöfnuðurinn og eftir því sem nær dregur einum eykst hann. Gini-stuðullinn hér á landi fyrir árið 2005 er 0,26 miðað við jöfnuð meðal hjóna. Sé litið á þróun hans undanfarinn áratug sést að ójöfnuður í launum er ekki að aukast. Til samanburðar þykir eðlilegt í Vestur-Evrópu að Gini-stuðullinn sé á bilinu 0,24 til 0,36.

Ójöfnuður kemur hins vegar í ljós þegar litið er til fjármagnstekna. Árið 2005 mældist Gini-stuðull þeirra 0,77 og hefur farið ört vaxandi. Fjármagnstekjustofninn þrefaldast hjá þeim sem minnst eiga en næstum tuttuguogfimmfaldast hjá þeim sem eiga mest.

Þótt nokkrir einstaklingar séu með margar milljónir í laun eru þeir fáir miðað við hópinn. En Gini-stuðullinn varðandi fjármagnstekjur sýnir hins vegar mikinn ójöfnuð, segir Benedikt.