Júníhallinn slær öll met

Vöruskiptahalli nam 66,8 milljörðum króna á fyrri helmingi árs, samkvæmt Hagstofu Íslands, og hefur aldrei verið meiri. Það er tæplega þrjátíu milljarða aukning frá fyrra ári. 15,7 milljarða króna vöruskiptahalli var í júní, en var til samaburðar 8,1 milljarður í fyrra, og er það mesti halli í einum mánuði frá því Hagstofan hóf að birta tölur.

Alls voru fluttar út vörur fyrir 114,3 milljarða króna fyrstu sex mánuði ársins og jókst verðmæti útflutts varnings um 4,9 prósent miðað við sama tímabil í fyrra. Sjávarafurðir voru 55,9 prósent alls útflutnings en iðnaðarvörur rúmlega 39 prósent. Hagstofan metur tölur um inn- og útflutning á föstu gengi og samkvæmt þeim hefur verðmæti sjávarafurða aukist um 2,1 prósent. Björn Rúnar Guðmundsson, sérfræðingur hjá Greiningardeild Landsbankans, bendir á að útflutningur á sjávarafurðum hafi þó dregist töluvert saman að magninu til á öllum sviðum sjávarútvegs. Á sama tíma hafi gengi krónunnar veikst og afurðaverð hækkað og því sé samdrátturinn ekki greinilegur í framsetningu Hagstofunnar. Mestur varð hann í útflutningi á loðnu- og síldarafurðum, eða um fimmtíu prósent miðað við sama tímabil í fyrra að raungildi.

Verðmæti vöruinnflutnings á fyrstu sex mánuðum ársins nam 181,2 milljörðum króna og jókst um 34,7 milljarða frá fyrra ári. Aukning varð á öllum sviðum innflutnings en mest í fjárfestingavöru, sem að mestu má rekja til aukinna stóriðjuframkvæmda, auk hrá- og rekstrarvöru. Mun minni aukningar gætir nú í innflutningi á neysluvörum en fyrr á árinu. Björn segir þó ólíklegt að samdráttar fari að gæta í innflutningi þeirra fyrr en á næsta ári.

Verð á útfluttum vörum eykst hraðar en verð á innfluttum vörum, sem Björn segir jákvæðar fréttir fyrir íslenska þjóðarbúið. Skýrist það meðal annars af hækkandi verði á sjávarafurðum og áli.

Vöruskiptahallinn fyrir allt árið í heild var 93 milljarðar króna í fyrra. Miðað við hvað hann er orðinn nú leikur enginn vafi á að meiri halli verði á vöruskiptum í ár en var í fyrra. Fjármálaráðuneytið gerir ráð fyrir halla upp á 110 milljarða, sem er í takt við væntingar Greiningardeildar Landsbankans.