Landsbankinn tekur sambankalán

Landsbankinn gekk í gær frá samningi um sambankalán upp á 600 milljón evrur, jafnvirði 54,8 milljarða íslenskra króna. Lánið er til þriggja ára.

Að sögn Brynjólfs Helgasonar, framkvæmdastjóra alþjóðasviðs Landsbankans, er lánið annars vegar notað til að ljúka endurfjármögnun þessa árs og til að fylla upp í endurfjármögnun næsta árs.

Endurfjármögnunarþörf bankans var um 1,2 milljarðar evra, jafnvirði 109,7 milljarða króna, á þessu ári en á næsta ári er hún um 2,6 milljarðar evra eða eða um 238 milljarðar króna. Endurfjármögnun þessa árs er lokið og er verið að undirbúa næsta ár, að sögn Bryjólfs.

Brynjólfur segir lánskjörin góð miðað við það sem hafi verið í gangi að undanförnu en þau séu talsvert dýrari en fyrir ári síðan þegar þau voru í lágmarki.

Landsbankinn bauð fjárfestum til þátttöku í sambankaláni að fjárhæð 300 milljónir evra en vegna mikillar eftirspurnar tvöfaldaði bankinn heildarfjárhæð lánsins.

Með viðskiptunum brýtur bankinn blað í sögu fjármögnunar á sambankalánamarkaði því talið er að þetta séu stærstu viðskipti sinnar tegundar á meðal íslenskra fjármálafyrirtækja.