Stjórn HB Granda verst yfirtökuhættu

Stjórn HB Granda hefur óskað eftir því að bréf félagsins verði afskráð af Aðallista Kauphallarinnar og skráð á nýja iSEC-markaðinn. Þetta gerir stjórnin til að varna því að félagið verði tekið af markaði og leyst upp.

Vísar stjórnin til greiningar sem Landsbankinn gaf út á dögunum um að ... hluthafar HB Granda yrðu betur staddir í dag ef fyrirtækið yrði leyst upp og eignir þess seldar heldur en að halda áfram óbreyttum rekstri.

Vogun, Fiskveiðahlutafélagið Venus og Hampiðjan fara saman með 44,48 prósent hlutafjár og eru talin hafa með sér samstarf um stjórnun félagsins en stjórnarmenn koma allir úr röðum þessara félaga. Félögin eru hins vegar ekki yfirtökuskyld.

Næststærsti hluthafinn í HB Granda er KB banki með tæp 24 prósent hlutafjár en bankinn hefur bætt stöðu sína verulega á undanförnum misserum og nánast verið einn á kauphliðinni. Þykir það benda til þess að KB banki vilji hugsanlega taka yfir félagið. Ekki náðist í Hreiðar Má Sigurðsson, forstjóra KB banka.

Við höfum áhuga á að vera á markaði, sagði Kristján Loftsson, stjórnarmaður í Granda, en vildi ekki tjá sig um málið að öðru leyti.

Minni kröfur eru gerðar til útgefenda þar sem ákvæði yfirtökulaga eiga ekki við á iSEC-markaðnum auk þess sem engar kröfur eru gerðar um fjölda hluthafa. Samkvæmt upplýsingum frá Kauphöll Íslands uppfyllir HB Grandi öll skilyrði um skráningu á Aðallista.