Magadans er ekki þjóðdans Araba

Flokksþing Framsóknarflokksins - Salmann Tamimi tölvunarfræðingur Í fréttum þann 25 febrúar kom fram að palestínskur magadans var sýndur á flokksþingi Framsóknarflokksins. Ég hef aldrei heyrt um eitthvað sem heitir "palestínskur magadans". Palestínskur þjóðdans heitir Dabka, en það sem er kallað magadans er í raun og veru kallað Raqs Sharki sem þýðir austurlenskur dans. Orðið magadans eða "belly dans" er fundið upp hérna á Vesturlöndum. Venjulegt fólk í Miðausturlöndum dansar ekki þennan magadans í því formi sem við sjáum hér. Þessi dans og klæðnaður sem var sýndur tilheyrir í raun stúlkum sem hafa það að atvinnu að dansa á börum og öðrum skemmtistöðum. Dansinn snýst um að sýna eins mikið og hægt er af líkama, og að sýna erótískar hreyfingar. Markmiðið er fyrst og fremst að gleðja karlmenn og þetta er einmitt það sem Arabar eru á móti og telja vanvirðingu við kvenfólk. Fólkið í Miðausturlöndum og Norður-Afríku lítur á þennan dans og dansara alveg eins og Íslendingar líta á súludans og enginn óskar neinum kvenmanni að fara þessa braut, þar sem misnotkun og niðurlægingin er algjör. En eins og í öðrum þjóðfélögum þá er til fólk sem hagnast á því að misnota kvenfólkið. Í Miðausturlöndum, þar sem aðskilnaður kynjanna er algjör, er þetta fyrirbæri ekki þekkt. Konur dansa í veislum og brúðkaupum í þessum löndum en þær eru aðskildar frá körlum og klæðnaður þeirra er venjulegur en ekki eins og klæðnaðurinn sem var notaður á flokksþingi Framsóknarflokksins. Þannig að magadans er ekki þjóðdans Araba né Palestínumanna. Arabar og Múslimar líta á magadansinn sem niðurlægingu fyrir konur, þar sem þetta er í raun og veru eins konar kúgun og misnotkun á manneskju og ég er hissa að Framsóknarflokkurinn skuli leyfa svona á sínum fundi. Eigum við von á því að sjá súludans á næsta flokksþingi? Ég vil hér með þakka Jónínu Bjartmarz fyrir að sýna rétt viðbrögð við svona misnotkun og kroppasýningu. Ég er líka hissa á því að Alþjóðahúsið skuli ekki kynna sér sögu dansins áður en fulltrúi þess kynnir það sem þjóðdans Araba og/eða Palestínumanna.