Minni hækkun hlutabréfa í ár

KB banki mun skila mestum hagnaði skráðra fyrirtækja árin 2004 og 2005 samkvæmt spá greiningardeilda Íslandsbanka og Landsbankans. Hagnaður KB banka í ár verður samkvæmt spánum á bilinu 15,2 til 18,5 milljarðar fyrir árið 2005. Greining Íslandsbanka býst við tapi á fjórða ársfjórðungi ársins 2004 hjá Landsbankanum vegna lakara gengis á hlutabréfamarkaði. Landsbankinn gerir ráð fyrir neikvæðum áhrifum hlutabréfaverðs á afkomu KB banka á síðasta fjórðungi, en minni á Íslandsbanka sem hefur dregið verulega úr hlutabréfaeign sinni innanlands. Fjármálafyrirtæki munu að öllum líkindum njóta mun minni gengishagnaðar á þessu ári, en á því síðasta. Greiningardeildirnar eru tiltölulega bjartsýnar fyrir hönd hlutabréfamarkaðarins fyrir komandi ár. Ekki er talin von til þess að árið í ár verði í nokkurri líkingu við árið í fyrra sem var metár í hækkun hlutabréfa. Greining Íslandsbanka gerir ráð fyrir að hækkun hlutabréfa verði fimmtán prósent á árinu og telur miklar hækkanir síðasta árs í samræmi við væntingar um hagnað þeirra á árinu. Þannig hafi kennitölur svo sem hlutfall hagnaðar og virðis og arðsemi eiginfjár ekki breyst að verulegu marki þrátt fyrir miklar hækkanir á árinu. Atli Guðmundsson sérfræðingur Greining Íslandsbanka segir útrás fyrirtækja ráða miklu um framhaldið á hlutabréfamarkaði. Hún verði stóra málið, líkt og á síðasta ári. Hann segir skamma reynslu komna á útrásina og því fylgi varnaðarorð um að hugsanlega vanmeti menn áhættuna af útrásarverkefnum. Útrás bankanna, skráning Actavis í London og yfirtaka Bakkavarar á Geest er meðal þess sem líklegt er til þess að hafa áhrif á þróun hlutabréfaverðs á árinu.