Strætó - slys

Almenningssamgöngur - Örn Sigurðsson, arkitekt. Þann 24. ágúst sl. samþykkti Samgöngunefnd Reykjavíkur nýtt leiðakerfi Strætó bs. í formi 42 bls. plaggs, sem nefnist "Strætó - tillaga og greinargerð". Um það plagg má hafa mörg orð, en að þessu sinni einskorðast umfjöllunin við neikvæð áhrif nýja leiðakerfisins á umferðaröryggi innan íbúðarhverfa. Á bls. 8 má lesa efirfarandi: "Upphækkanir og hraðahindranir: Mjög brýnt er að ekki séu hraðahindranir í formi upphækkana þar sem strætisvagnar aka um. Þetta er afar brýnt þar sem stofnleiðir eiga í hlut og því mikilvægt að þegar verði hugað að öðrum ráðstöfunum, sem tryggja umferðaröryggi á þeim götum þar semstofnleiðir aka um". Þetta þýðir í raun að um 23 upphækkanir hverfa af götum í Breiðholti, 5 í Seláshverfi og 10 í Grafarvoghverfi þó engar aðrar ráðstafanir séu þekktar, sem gætu komið í stað þeirra svo umferðaröryggið á þessum stöðum yrði tryggt! Á fyrrnefndum fundi Samgöngunefndar Reykjavíkur þann 24. ágúst sátu 3 af 5 verkfræðingum á framkvæmdasviði Reykjavíkurborgar (áður embætti Borgarverkfræðings) í Skúlatúni 2, sem starfa við umferðaröryggismál, Ólafur Bjarnason og undirmenn hans Baldvin Baldvinsson og Stefán A Finnsson. Telja verður að þeir hafi að þessu sinni sofið á verðinum á meðan samþykkt var að rýra umferðaröryggið með svo afgerandi hætti. Telja verður óhjákvæmilegt að íbúar í Breiðholti, Seláshverfi og í Grafarvoghverfi, sem þessi stór hættulega breyting bitnar á, bregðist við, bindist samtökum og hnekki þessum áformum með öllum tiltækum ráðum, t.d. með fundum í íbúasamtökum, skrifum í blöðin og innhringingum í spjallþætti og kröfubréfum til kjörinna fulltrúa, því hér er mikið í húfi. Göturnar, sem upphækkanirnar eru á, voru áður með mjög mörg slys, sem hurfu eftir að upphækkanirnar komu. Höfundur er talsmaður Höfuðborgarsamtakanna.