Mikil aukning í bílainnflutningi

Á fyrstu tveimur mánuðum ársins voru 2.406 bílar nýskráðir hér á landi. Þetta er 63 prósentum meira en sömu mánuði í fyrra. Greiningardeild Íslandsbanka spáir því að í heild verði um sextán prósent fleiri nýjar fólksbifreiðar skráðar en á árinu 2004. Ingólfur Bender, forstöðumaður greiningardeildar Íslandsbanka, segir að nýskráning bíla sé mjög áhugaverð vísbending um þróun efnahagsmála. "Þetta er hitamælir á þjóðarbúið og hefur alltaf verið. Þegar það dregur saman í hagkerfinu þá spara menn sér að endurnýja bíla en ráðast í það þegar það er uppsveifla," segir hann. Reynsla slíðustu ára sýnir að ákveðinn toppur myndast í bílainnflutningi um miðbik eða á síðari hluta efnahagsuppsveiflunnar. Mikil sala var til dæmis árið 1999 en síðan þá dró úr innflutningi fram til ársins 2003. Að mati greiningardeildarinnar er ekki líklegt að innflutningur nýrra bíla verði jafnmikill og árið 1999 en spá hennar gerir ráð fyrir að hann verði svipaður og árin 1998 og 2000. Ingólfur segir að vera megi að aukninguna í nýskráningu bíla megi að hluta rekja til þess að breytingar hafi orðið á fjármögnun bílakaupa. Nú færist mjög í vöxt að einstaklingar geri rekstrarleigusamninga um bíla í stað þess að fjárfesta í þeim beint. Þrátt fyrir þetta telur Ingólfur að tölurnar gefi til kynna að almenn velmegun sé að aukast og það megi meðal annars merkja á því að sala á stórum og dýrum bílum hafi aukist sérstaklega mikið. Nú eru um 190 þúsund bílar skráðir á landinu og þar af er talið að um 145 þúsund fólksbifreiðar séu í notkun. Greiningardeildin bendir á að þar sem um 170 þúsund Íslendingar hafi bílpróf láti nærri að í umferð sé einn bíll á hvert ökuskírteini. "Þetta lýsir ágætlega uppbyggingu hagkerfisins. Landið er strjálbýlt og bílar eru það sem menn nota til ferðalaga. Þetta veldur því að við þurfum á góðum bílaflota að halda," segir Ingólfur. Þá hefur það áhrif á fjölgun nýskráninga að fjöldi ferðamanna fer sívaxandi og margir þeirra notast við bílaleigubíla þegar þeir ferðast um landið.