Kvikmyndaskoðun vanhæf til verks

Börn og kvikmyndir - Ívar Halldórsson Þá úrskurðar Kvikmyndaskoðun hvort takmarka skuli dreifingu kvikmyndar miðað við tiltekið aldursmark teljist kvikmyndin að mati Kvikmyndaskoðunar geta haft skaðleg áhrif á siðferði eða sálarlíf barna.   (Reglugerð um kvikmyndaskoðun). Sú var tíðin að foreldrar gátu treyst Kvikmyndaskoðun til að leggja siðferðislegt mat á kvikmyndir hérlendis en því miður virðist að nú sé tíðin önnur. Ýmsu má um kenna til að dusta af sér óánægju almennings eins og fjármagnsskorti, veikindum eða tímaleysi ríkisstarfsmanna, en þegar dómgreindarleysi unglinga í garð siðferðis og vímuefna fer vaxandi og umræða um úrlausnir er á allra vörum í fjölmiðlum og skólum hlýtur vægi eftirlitsnefnda að aukast hvað þetta varðar. Ekki fyrir löngu var sýnd kvikmynd í kvikmyndahúsum hérlendis, "The Girl Next Door", sem talin var í fyrstu að mati Kvikmyndaskoðunar við hæfi allra aldurshópa. Eftir kvörtun frá skólakennurum og foreldrum og vegna birtingar greinar í Fréttablaðinu leiðrétti Kvikmyndaskoðun mat sitt og var nú myndin ekki talin við hæfi barna yngri en 14 ára Þess skal þó getið að myndin var ekki talin við hæfi barna yngri en 16 ára erlendis. Nú er myndin komin út á myndabandi og inniheldur nú atriði sem erlendis þóttu of gróf fyrir hvíta tjaldið og ekki hæfa börnum yngri en 18 ára. Það sem vekur mikla furðu hjá mér er að nú er myndin að mati Kvikmyndaskoðunar aftur við hæfi allra aldurshópa þrátt fyrir grófara innihald! Ég og kona mín horfðum á þessa mynd um daginn þegar börn okkar voru sofnuð til að geta lagt dómbært mat á myndina sem foreldrar fimm íslenskra barna. Boðskapur myndarinnar nær nú til allra aldurshópa, þökk sé Kvikmyndaskoðun, en spurningin er hvort við foreldrar séum sátt við að 6-15 ára gömul börn okkar horfi á ljósbláar klámmyndir. Í myndinni kennir ýmissa grasa: Áhorfendur, ungir sem aldnir, sjá mikið úrval rassa, ber brjóst, glefsur úr klámmyndum, súludansa, kjöltudansa, lesbíur í ham, munngælur, "ljóma" klámmynda-iðnaðarins og svona mætti lengi upp telja. Það sem vekur jafnvel enn meiri hrylling er að í myndinni er skýrt tekið fram að e-töflur séu ekki hættulegar og geri mann bara skemmtilega ruglaðan. Þetta sendir vissulega brengluð boð til ungra barna! Fjöldi fórnarlamba eiturlyfja fer ört hækkandi og margir ástkærir unglingar okkar hafa látist vegna eiturlyfjaneyslu. Hversu margir foreldra vilja að klámstjörnur og eiturlyfjaneytendur séu fyrirmyndir barna sinna? Menntamálaráðuneyti þyrfti að endurskoða siðgæðisþrek starfsmanna Kvikmyndaskoðunar. Þeirra starf ætti að felast í því að verja börn okkar gegn utanaðkomandi áreiti sem spillt getur sálarlífi, sakleysi og siðgæðisvitund. En þar til siðgæðisvitund Kvikmyndaskoðunar vaknar þurfa foreldrar að standa saman um velferð barna sinna og meina utanaðkomandi skaða aðgang að sálarlífi þeirra.