Með lögum skal lamaða kúga

Lengi skal manninn reyna. Það er næstum lögmál. Einnig má heimfæra það á stjórnmálaflokka. Síðustu misserin hefur R-listinn hagað sér eins og örvinglaður maður í sjálfsmorðshugleiðingum. Hann hamast fyrir allra augum við að grafa eigin gröf. Hroki og yfirlæti gagnvart þeim sem minna mega sín, er farið að einkenna hann. Fólkinu sem setti R-listann í öndvegi í kosningum, er nú vikið til hliðar fyrir annarlegum sjónarmiðum og það talið börn síns tíma. Það er blindur og heyrnarlaus maður sem ekki sér hvað borgarstjórn er að gera öryrkjum og láglaunafólkinu. R-listinn hafði ekki verið lengi við völd, þegar hann sá sér hag í því að gera lamað fólk að gamalmennum við 67 ára aldur. Það helgaðist af lægri greiðslum og því að við að breytast úr lömuðum manni í gamlan, þurfti viðkomandi að borga fyrir heimaþjónustu. Nýlega ákvað borgarstjórn að brjóta stjórnarskrána á gróflegri hátt en Reykvíkingum gat til hugar komið að fulltrúar hennar gerðu. Ferðaþjónustu fatlaðra var bannað að flytja öryrkja eldri en 67 ára. Rökin eru líklega sótt í lög eða reglur um að þjónustunnar njóti eingöngu fatlaðir. Þvílík túlkun á lögum, rangsleitni, grimmd og glámskyggni. Skilningur á mannlegu þáttunum er víðsfjarri hjá borgarstjórn. En það er ekki allt talið. Borgarstjórn hækkaði í skyndi gjöld með ferðaþjónustu fatlaðra um tæpan helming. Hún hefur keypt verri bíla til þjónustunnar og horfir í þeim efnum sem fleirum, vart fyrir fætur sér. Hún hefur stórhækkað gjöld heimaþjónustunnar og þannig gert fólki erfitt að búa heima og forðast stofnanir. Maður gæti haldið að borgarstjórn geri sér far um að skapa öryrkjum svo hörmulega tilveru að þeir deyi úr leiðindum. Sjónarmið út af fyrir sig. Ég hef kynnst fjölda fólks í hjólastólum og öðrum með enn minni möguleika til viðunandi lífshátta. Margt af þessu fólki er þrátt fyrir böl sitt, bjartsýnt og lætur ekki óvinsamleg stjórnvöld slá sig út af laginu. Bregði hjón búi vegna mikillar fötlunar annars þeirra og fari í fjarbúð með aðskilinn fjárhag, eru húsaleigubætur út úr kortinu. Allar smugur eru nýttar til að hafa fé af fötluðum og gera þeim lífið leitt. Ég fullyrði að þeir hafa nóg af erfiðleikum á sinni könnu þó borgarstjórn bæti ekki þar við.