Bók sem engan svíkur

Almanak Þjóðvinafélagsins - Auðunn Bragi Sveinsson rithöfundur Ein er sú bók, sem mér finnst ómissandi og ég lít í næstum daglega.Það er Almanak Hins íslenska þjóðvinafélags. Þetta rit hefur komið út í 131ár, og engin ellimerki eru á því sjáanleg, fremur virðist það vaxa og verða blómlegra með hverju árinu sem líður. Árbók Íslands er einkar forvitnileg, því að þar eru tíundaðir helstu viðurðir liðins árs. Ritiðer að verða allmikið myndum prýtt í seinni tíð,og eykur það gildi þess. Núverandi umsjónarmaður Árbókar Íslands í Almanakinu er Heimir Þorleifsson, sagnfræðingur.Hann vinnur þarna sannarlega þarft verk, sem geymist óbornum niðjum þessa lands.Þarna er sagan í hnotskurn. Almanak Þjóðvinafélagsins er með merkustu bókum,sem gefnar eru út árlega.Það stendur upp úr,þegar margar bækur, sem meira er gumað af, eru gleymdar og gufaðar upp.Ég hvet sem flesta til að lesa Almanakið.Það svíkur engan.