Raforkuriddarinn

Raforkuverð - Sigurjón Þórðarson  alþingismaður Frjálslynda flokksins Á nýársdag hlotnaðist Valgerði Sverrisdóttur sá mikli heiður að hljóta stórriddarakross íslensku fálkaorðunnar fyrir störf í opinbera þágu og vil ég nota tækifærið og óska henni til hamingju.Ekki er nokkur vafi á því að Valgerður hefur beitt sér ötullega fyrir opinberum stórvirkjunum og jafnvel svo mjög að í kjölfar orðuveitingar herra Ólafs Ragnars Grímssonar hefur hún hlotið sæmdarheitið raforkuriddarinn manna á meðal. Sá böggull fylgir þó skammrifi að önnur verkefni ráðherrans hafa verið látin sitja á hakanum. Þekkt er hve ráðherrann hefur lítt sinnt brotum á samkeppnislögum sem varða almenning miklu. Mál tryggingafélaganna dagaði nánast uppi í eftirlitsstofnun ráðherrans eftir að hafa verið til þar til "meðferðar" í rúm 7 ár. Ekki var talið rétt að beita fyrirtækin sem hlunnfóru neytendur neinum þvingunarúrræðum öðrum en tilmælum um að brjóta ekki af sér að nýju. Byggðarmálum hefur nánast ekkert verið sinnt og hafa ýmsar ákvarðanir og ummæli ráðherrans verið vægast sagt mjög umdeild. Í pistli á heimasíðu ráðherrans má lesa sérkennilegt viðhrof til sjávarútvegs og sjávarbyggðanna. Í pistlinum er viðurkennt að kvótakerfið væri sjávarbyggðunum dýrt en svo heilagt væri kerfið að það væri af og frá að breyta því á nokkurn hátt og vera með því að föndra við byggðirnar. Við í Frjálslynda flokknum sjáum alls ekki neinn heilagleika við kerfi sem skilar helmingi minni botnfiskafla upp úr sjó en fyrir daga þess. Byggðamálaráðherrann hefur ennfremur beitt sér fyrir því að afnema flutningsjöfnun til landsbyggðarinnar og skilað þinginu afspyrnu lélegri skýrslu um framvindu byggðamála. Nýtt skipulag í raforkumálum virðist ætla að verða þeim fjölmörgu á landsbyggðinni sem kynda hús sín með raforku dýrkeypt og hækkar orkuverðið um 15%. Raforkufyrirtækin bera þá aumu afsökun á borð að ekki sé lengur heimilt að veita sérstaka afslætti vegna rafmagns til húshitunar. Raforkufyrirtækin minnast ekki á að það er ekkert sem stendur í vegi fyrir því að þau lækki verðið sem nemur þeim afslætti sem þau hafa gefið um árabil. Ég skora á iðnaðarráðherra að beita sér fyrir því að koma með öllum ráðum í veg fyrir þá miklu hækkun sem er boðuð á húshitunarkostnaði. Ef ekki verður komið í veg fyrir boðaða hækkun, þá tel ég að þeir fjölmörgu sem verða fyrir verulegri hækkun á húshitunarkostnaði munu minnast Valgerðar og Framsóknarflokksins þegar þeir greiða hækkaðan rafmagnsreikninginn.