Stofa verður banki

Verðbréfastofan hefur sótt um leyfi til að stunda fjárfestingarbankastarfsemi. Hefur slíkt verið í undirbúningi um nokkurn tíma og búist er við að leyfið verði veitt næstu daga. Jafet Ólafsson, forstjóri Verðbréfastofunnar, segist geta boðið viðskiptavinum upp á fjölbreyttari þjónustu með þessu leyfi.

Hann telur að öðru leyti ekki tímabært að tjá sig um málið fyrr en leyfið fáist. Fjárfestingarbankar mega í raun stunda alla hefðbundna bankastarfsemi samkvæmt lögum. Þeir mega samt ekki taka við innlánum frá einstaklingum og fyrirtækjum. Er það meginmunurinn á fjárfestingarbanka og hefðbundnum viðskiptabanka. Hingað til hefur þjónusta Verðbréfastofunnar byggst á ráðgjöf, eignastýringu og miðlun verðbréfa. Fyrirtækið var stofnað árið 1996. Samkvæmt heimasíðu eru hluthafar 65 og eigið fé 440 milljónir króna.