Kaupmáttur eykst minna

Kaupmáttaraukning launa í fyrra var sú minnsta í heilan áratug. Kaupmáttur jókst um 1,5 prósent. Að meðaltali hefur kaupmáttur aukist um 3,6 prósent á ári síðastliðinn áratug. Laun hækkuðu í fyrra um 4,7 prósent að meðaltali, en verðbólgan sá til þess að lítill hluti varð eftir í launaumslögunum sem raunveruleg hækkun. Laun hækkuðu vegna kjarasamninga, en þensla var ekki mikil á vinnumarkaði og launaskrið því ekki mikið. Greining Íslandsbanka segir líkur á að sú staða muni breytast á þessu ári. Jafnframt muni verðbólga fara lækkandi að því gefnu að krónan haldist sterk. Íslandsbanki spáir því að kaupmáttur muni vaxa um 2,5 prósent á þessu ari. Kaupmáttur hefur aukist samfellt síðastliðinn áratug og var árið 1998 metár, þegar kaupmátturinn jókst um heil 7,6 prósent. Þá fóru saman miklar launahækkanir og lítil verðbólga.