Framsókn og ESB

Evrópusambandið -  Guðmundur Jónas Kristjánsson bókhaldari Ljóst er að skiptar skoðanir eru orðnar á afstöðu framsóknarmanna til Evrópusambandsins (ESB) ef marka má niðurstöðu flokksþings Framsóknarflokksins nýverið. Vekur þetta furðu, ekki síst þegar horft er til þess úr hvaða jarðvegi flokkurinn er sprottinn, og hvert hann hefur löngum sótt fylgi sitt. Hinir fjölmörgu andstæðingar aðildar að ESB og sem stutt hafa Framsóknarflokkinn í þeirri góðri trú að þar væri á ferð ábyrgur og þjóðlegur stjórnmálaflokkur, hljóta því nú að skoða alvarlega stuðning sinn við flokkinn, ef fram heldur sem horfir. Menn hljóta að skipa sér í stjórnmálaflokka meðal annars eftir því hver stefna þeirra er í Evrópumálum. Spurningin um aðild Íslands að ESB á eftir að verða eitt stærsta pólitíska hitamálið á Íslandi á komandi árum. Verður Ísland áfram frjálst og fullvalda ríki, með óskert yfirráð yfir sínum dýrmætu auðlindum? Eða verður það lítil áhrifalaus hjáleiga í komandi Sambandsríki Evrópu? Um þetta verður hart tekist í íslenskum stjórnmálum næstu ár.