Spennandi kosningar framundan

Allt útlit er fyrir afar spennandi lokaumferð líbönsku þingkosninganna á sunnudaginn. Óvæntur sigur Michel Aoun, fyrrverandi hershöfðingja, kom eins og köld vatnsgusa framan í and-sýrlensku flokkana sem búist hafði verið við að ynnu yfirburðasigur í kosningunum. Þeir reyna nú að ná vopnum sínum aftur. Fyrir kosningarnar á sunnudag í Mið- og Austur-Líbanon vantaði flokka Saad Hariri, sonar Rafik Hariri sem ráðinn var af dögum í febrúar, og Walid Jumblatt, leiðtoga drúsa, 46 þingsæti til að ná meirihlutanum á líbanska þinginu en þeir hafa leitt andstöðuna gegn Sýrlendingum. Óvæntur sigur flokks Michel Aoun og gott gengi Hizbollah í Beqa-dalnum gerði hins vegar vonir þeirra að engu og því vantar þá enn nítján sæti. Það gæti þó hafist á sunnudag þegar kosið verður í norðurhluta landsins um 28 sæti. Í gær reyndu þeir félagar að stappa stálinu í stuðningsmenn sína. Michel Aoun leiddi á sínum tíma vopnaða baráttu gegn Sýrlendingum en var sendur í útlegð eftir að hafa verið sigraður. Hann stormaði hins vegar óvænt inn í líbönsk stjórnmál fyrir aðeins fimm vikum og gerði bandalag við stuðningsmenn Sýrlendinga.