Solskjær biður um tíma

Norski framherjinn Ole Gunnar Solskjær biður stuðningmenn Manchester United um að gefa sér tíma til að koma til baka úr langvarandi meiðslum sínum og segir að fólk verði alfarið að stilla væntingar sínar í hóf með framhaldið á ferli sínum. Solskjær spilaði sjö mínútur með Manchester United í jafnteflinu gegn Birmingham í gær, en það var í fyrsta sinn í átján mánuði sem hann spilaði í úrvalsdeildinni.

"Móttökur stuðningsmanna voru mér hjartnæmar og ef til vill óraunhæfar að sumu leiti," sagði Solskjær. "Vonandi næ ég að sýna eitthvað í framhaldinu, því ég á enn nokkuð í land, en það var frábær tilfinning að koma aftur á völlinn og geta veifað til áhorfendanna."