Meðferð sem virkar

Einhverf börn - Anna Valdimarsdóttir og Guðmundur Örn Jónsson Lengst af hefur verið litið á einhverfu sem ævilanga fötlun sem ekkert væri hægt að gera við, en á seinustu árum hafa erlendir sérfræðingar sýnt fram á að hægt er að "lækna" allt að helming einhverfra barna með réttri meðferð. Meðferðin er einnig arðbær samkvæmt rannsóknum íslenskra hagfræðinga sem mátu hana á sama hátt og hvern annann fjárfestingarkost. Með öðrum orðum "læknast" það mörg börn að sparnaðurinn við að þurfa ekki að aðstoða þau ævilangt er meiri en kostnaðurinn við að veita öllum börnum meðferðina. Þannig þarf því engin mannúðarsjónarmið til að réttlæta meðferðina, það er einfaldlega ódýrara að veita hana heldur en að gera það ekki. Meðferðin er samt ekki í boði á Íslandi og fyrir því er aðallega ein ástæða. Meðan sveitarfélög myndu borga fyrir meðferðina, nýtur ríkið allrar arðsemi af henni í formi lægri útgjalda til fatlaðra. Þannig sjá sveitarfélög sér engan fjárhagslegan hag af því að bjóða upp á hana. Það gæti einnig verið dýrt fyrir eitt þeirra að skera sig úr og veita meðferðina þar sem líklegt er að fjölskyldur einhverfra myndu flytja þangað í stórum stíl. Líklegast fá börn hvergi betri læknisþjónustu en á Íslandi. Við sendum t.d. hjartveiku börnin okkar á bestu spítala í heimi ef það gagnast þeim. Það er því ólíklegt að mikið lengur verði gengið framhjá einhverfum börnum. Bandaríkjamenn gera það ekki og þarlend lög tryggja nú þegar öllum einhverfum börnum meðferð sem virkar. Þar til það gerist munum við hjónin halda áfram að greiða fyrir meðferð barnsins okkar svo hún líkist sem mest þeirri meðferð sem virkar. Þeim tveimur milljónum sem í það fóru á seinasta ári hefði ekki getað verið betur varið. Það hryggir okkur þó að vita til þess að ekki hafa allir foreldrar fjármuni til þess að gera slíkt hið sama.