Kaupa ekki Numis

Talsmaður Landsbankans segir að fréttir breskra fjölmiðla um að bankinn hyggist gera yfirtökutilboð í fjármálafyrirtækið Numis í Bretlandi séu rangar. Hann staðfestir hins vegar að Landsbankinn hafi ráðið alþjóðlega ráðgjafafyrirtækið HSBC til þess að aðstoða við leit að tækifærum til fjárfestingar í breskum fjármálafyrirtækjum. Landsbankinn vísar því einnig á bug, sem fram kom í fréttum í Bretlandi, að tilraun hafi verið gerð til að kaupa verðbréfafyrirtækið Evolution Group. Talsmaður Landsbankans útilokar hins vegar ekki að þessi tvö fyrirtæki hafi komið til athugunar hjá HSBC en hið sama geti gilt um tugi annarra fyrirtækja sem hafi verið gaumgæfð. Forsvarsmenn Landsbankans hafa ítrekað lýst yfir að hugur þeirra standi til fjárfestinga í útlöndum og gerði bankinn tilraun til að kaupa danska bankann FIH. Sú tilraun mistókst og KB banki keypti bankana á um níutíu milljarða. Landsbankinn telur sig færan um að fjárfesta í útlöndum fyrir um hundrað milljarða króna og því væri fjárfesting í Numis ekki stór biti miðað við framtíðaráform bankans.