Tvöfaldast í Noregi

Íslandsbanki hefur gert tilboð í öll hlutabréf Bolig og Næringsbanken, BNbank, í Noregi fyrir um 33 milljarða króna. Íslandsbanki hefur þegar tryggt sér um 30 prósenta hlutafjár í bankanum og auk þess samþykki 16 prósenta í viðbót. Íslandsbanki liðlega tvöfaldast að stærð við kaupin og eignir hans við yfirtöku norska bankans verða yfir þúsund milljarðar. Íslandsbanki bauð nýtt hlutafé til sölu í gær vegna kaupanna og seldist það upp á skömmum tíma. Fyrirhugað er útboð með forkaupsrétti til hluthafa og hafa tveir þriðju lýst yfir þátttöku og stuðningi við kaupin í Noregi. BN bankinn er á margan hátt líkur danska FIH bankanum sem KB banki keypti fyrr á þessu ári. Afkoma bankans hefur verið stöðug og hann rekinn með hagnaði frá 1961, einnig á því tímabili sem bankakreppa reið yfir Noreg. Útlán bankans eru að mestu til fyrirtækja með veðum í fasteignum. Hagnaður bankans á síðasta ári nam rúmum tveimur milljörðum króna. "Við álítum að við séum að kaupa mjög góðan banka. Þetta er banki sem hefur verið vel rekinn í langan tíma og með gott eignasafn," segir Bjarni Ármannsson, forstjóri Íslandsbanka. "Þessi kaup munu umbreyta Íslandsbankasamstæðunni í íslensk-norskan banka þar sem meirihluti útlána verður í Noregi." Bjarni segir kaupin gefa tækifæri til þess að þróa áfram starfsemi bankans í Noregi. Samkvæmt norskum lögum ber stjórn að fjalla um yfirtökutilboð. Stjórn BNbank telur verðið of lágt og mælir ekki með því. Ástæða þess er meðal annars sú að stjórnin væri í sérkennilegri stöðu ef hærra boð bæðist eftir að stjórnin hefði mælt með núverandi tilboði. Búast má við að í kjölfarið verði lítilsháttar sálfræðistríð um endanlegt verð fyrir bankann. Samkvæmt heimildum bendi fátt til þess að hærra tilboð komi í bankann og því yfirgnæfandi líkur á að Íslandsbanki þurfi ekki að hækka verð að marki til að eignast bankann. Gengi Íslandsbanka hækkaði í gær um rúm sjö prósent í kjölfar tilkynningar um kaupin í Noregi og niðurstöðu hlutafjárútboðs.