Verslað með stofnfé

Nokkur viðskipti hafa átt sér stað með stofnbréf í Sparisjóði Reykjavíkur og nágrennis á síðustu dögum. Á fimmtudag byrjaði HF verðbréf að hafa milligöngu um sölu á stofnbréfum. Eigendum stofnfjár var tilkynnt um þetta bréflega í vikunni og segir Halldór Friðrik Þorsteinsson hjá HF verðbréfum að nokkur viðskipti hafi þegar átt sér stað. Gengið í þeim viðskiptum hefur verið fimm sem er nokkuð lægra en KB banki bauð þegar til stóð að sameina SPRON og KB banka nú í vetur. Viðskipti með stofnfé eru háð samþykki stjórnar SPRON en næsti stjórnarfundur verður í næstu viku. Stjórnin hefur þegar komist að þeirri niðurstöðu að viðskipti með stofnfé á yfirverði séu heimil og í tilkynningu frá stjórninni í vikunni segir að hugmyndir um markað með stofnfé hafi þegar verið kynnt Fjármálaeftirlitinu. Að sögn Halldórs Friðriks er markaður með stofnbréfin að skapast og kauptilboð og sölutilboð að mætast.