Varar við breytingum

Seðlabankinn varar eindregið við því að lögum um Íbúðalánasjóð verði við núverandi aðstæður breytt á þann veg að sjóðnum verði heimilt að lána 90 prósent af kaupverði íbúða. Seðlabankinn telur að slík breyting kunni að ýta undir ofþenslu og raska fjármálastöðugleika. Árni Magnússon félagsmálaráðherra segir skýrsluna ekki breyta fyrirætlunum ríkisstjórnarinnar um breytingu á húsnæðislánakerfinu. Skýrslan var unnin að beiðni félagsmálaráuneytisins vegna fyrirhugaðra breytinga. Seðlabankinn segir meðal annars að fyrirhuguð kerfisbreyting sé "til þess fallin að auka þenslu í þjóðarbúskapnum í nokkur ár sem væri sérlega óheppilegt í ljósi efnahagshorfa næstu ár," og að breytingin gæti valdið því að Seðlabankinn þyrfti að "bregðast við með hærri stýrivöxtum en ella". Árni Magnússon segir að sér hafi verið kynnt skýrslan í haust og síðan hafi margt breyst. "Það er ósköp fróðlegt að fletta í gegnum hana en fyrir mér er hún fyrst og fremst sagnfræði. Ég hef hvatt þá til að fylgjast með því sem er að gerast á markaðnum núna og það sem við ætlum okkur að gera í ljósi frumvarpsins sem ég hef lagt fram í þinginu ruggar þessum bát ekki miðað við það sem bankarnir hafa gert," segir hann. Hallur Magnússon hjá Íbúðalánasjóði bendir á að skýrslan hafi að mestu verið unnin síðasta vetur og í vor áður en bankarnir byrjuðu að bjóða íbúðalán með allt að hundrað prósenta veðsetningarhlutfalli. "Við erum ekki sammála þessu mati Seðlabankans," segir hann.