Kaupa í Noregi

Íslandsbanki bauðst í dag til að kaupa öll hlutabréf í norska, Bolig og næringsbanken. Fyrir hafði Íslandsbanki tryggt sér yfirráð yfir 46 prósentum hlutafjárins í bankanum. Við yfirtökuna eykur Íslandsbanki veltu sína um helming. Einar Sveinsson, stjórnarformaður Íslandsbanka, segir að um mikilvgan áfanga sé að ræða og þetta muni aðeins leiða til þess að Íslandsbanki eflist og þjónusta hans sömuleiðis. Fyrir á Íslandsbanki norska Kreditbanken og skilgreinir sig nú sem norsk-íslenskan banka. BN bankinn sérhæfir sig í húsnæðislánum að tveimur þriðju og lánum til atvinnulífsins. Samanlagður efnahagsreikningur Íslandsbanka er 1000 milljarðar eftir yfirtökuna en var fimmhundruð. Það er langt í land fyrir bankann að slaga upp í veldi KB banka í Skandinavíu en hann veltir um sextán hundruð milljörðum. Bjarni Ármannsson, forstjóri Íslandsbanka, segir kaupverðið um 33,5 milljarða og tæplega 30% eignarhlutur hafi verið samþykktur þegar. Hluthafar sem eigi um 16% eignarhlut hafi samþykkt tilboðið ef annað verist ekki. Bjarni segir kaupin að mestu fjármögnuð með eigin fjárframlögum og farið verði í hlutafjárútboð á alþjóðlegum markaði. Bjarni segir að hið nýja fyrirtæki eigi að verða öflugt í þjónustu við sína viðskiptavini og muni bjóða samkeppnishæf kjör að öllu leyti.