Fjárfestahópar í startholunum

Hlutabréf í Símanum ruku upp í Kauphöll Íslands í gær. Verðið hækkaði um 17,5 prósent í fimm viðskiptum og samkvæmt núverandi gengi er Síminn um 66 milljarða króna virði. Það ber þó að hafa í huga að einungis um eitt prósent af hlutabréfum í félaginu eru á markaði. Hin 99 prósentin eru í höndum ríkisins. Verðmyndun á bréfum í félaginu er því ekki endilega talin gefa eðlilega mynd af raunverulegu verði. Fréttablaðið hefur heimildir fyrir því að nokkrir hópar fjárfesta vinni nú þegar að því að mynda samstarf um kaup á kjölfestuhlut í Símanum þegar félagið verður einkavætt. Fjárfestar hafa bæði pólitískar og rekstrarlegar forsendur í huga við undirbúninginn en flestir munu þó telja að verðið á fyrirtækinu verði á bilinu 35 til 45 milljarðar króna. Einkavæðingarnefnd hefur enn ekki auglýst eftir ráðgjafa við sölu á Símanum en talið er fullvíst að stefnt sé að því að salan eigi sér stað innan nokkurra mánaða. Meðal þeirra aðila sem talið er víst að hafi áhuga á að eignast Símann eru Straumur fjárfestingarbanki og S-hópurinn svokallaði, hugsanlega með aðkomu stjórnenda Símans. Þá telja aðilar á markaði líklegt að Björgólfsfeðgar hafi áhuga á fyrirtækinu. Ekkert hefur þó fengist staðfest í þessum efnum. Fjárfestar telja að miklir hagræðingarmöguleikar séu í rekstrinum en óttast að ströng útboðsskilyrði kunni að binda hendur eigenda.