Flugeldaverð aldrei hagstæðara

Innflytjendur og seljendur flugelda hófu undirbúning áramótasölunnar fyrir mörgum mánuðum. Fyrstu drög voru raunar lögð fyrir tæpu ári því pantað er á vormánuðum eftir umfangsmiklar markaðsathuganir þar sem þörfin er metin.

"Þó álagið sé einn mánuður á ári er þetta hlutur sem þarf að huga að allt árið um kring," segir Lúðvík Georgsson hjá KR-flugeldum.

KR-flugeldar er umsvifamikið fyrirtæki í innflutningi flugelda og selur þá í heildsölu til fjölmargra íþróttafélaga og fleiri útsöluaðila. Flugeldaumsýsla Slysavarnafélagsins - Landsbjargar er einnig risavaxin og þar hafa menn haft í nægu að snúast frá byrjun mánaðar þegar gámarnir komu til landsins.

"Við höfum verið í talningu, pakkningu og dreifingu frá því um mánaðarmót," segir Friðfinnur Guðmundsson hjá Landsbjörg.

Bróðurpartur flugelda og annars sprengiefnis sem kveikt er í á gamlárskvöld kemur úr austurvegi. 

"Kína er jú fæðingarland flugeldanna en við kaupum líka talsvert frá Þýskalandi. Þjóðverjarnir búa enn þá til bestu rakettur í heimi og vönduðustu stjörnuljósin," segir Lúðvík KR-ingur. 

Hann lofar nýjungum í ár, segir kökurnar hafa þróast og sjá megi ljósin sveipast um himininn eins og rúðuþurrkur eða tjaldhurð sem opnast neðan frá. Friðfinnur er hins vegar varkárari þegar talið berst að nýjungum.

"Þegar menn segjast vera með nýjungar í ljósum og hljóðum þá tek ég því með varúð. Umbúðir og útlit breytast alltaf eitthvað en ég er efins með hitt."

Hvað sem því líður er ljóst að flugeldakaupin í ár ættu að vera vinveitt veskinu, verðið ætti að standa í stað frá í fyrra eða jafnvel lækka.

"Verðþróunin hefur verið samfellt niður á við frá því það fór í skelfilegar hæðir árið 2001. Kínverska varan hefur lækkað um fimm til tíu prósent út af hagstæðu gengi Bandaríkjadals," segir Lúðvík. Friðfinnur tekur undir þetta en bendir á að innkaupin hafi verið gerð í vor þegar dalurinn var töluvert hærri en hann er í dag. "Verðið verður það sama eða lægra, það hækkar allavega ekkert."

Athuganir leiða í ljós að flugeldar voru fluttir til landsins í um 30 stórum gámum og ætti ljósadýrðin á himninum að geta orðið talsverð. Ekki spillir að verðið er hagstætt, jafnvel hagstæðara en nokkru sinni ef marka má upplýsingar viðmælenda. Það er því ekki annað að gera en vona að veðrið verði til friðs.