Tíu milljarða hagnaður

Samanlagður hagnaður KB banka og danska bankans FIH sem KB banki hefur tryggt sér kaup nam tæpum tíu milljörðum króna á fyrri hluta ársins. Sá danski á hagnaðist um 3,8 milljarða íslenskra króna fyrstu sex mánuði ársins. Bankinn hefur hækkað áætlun um hagnað ársins um fjögur hundruð milljónir og gerir ráð fyrir 7,2 milljarða hagnaði af rekstri ársins 2004. Lánasafn FIH er einkar traust þannig nema afskriftir af útlánum fyrstu sex mánuði ársins aðeins um 200 milljónum íslenskra króna sem er brot af því sem íslensku bankarnir hafa verið að afskrifa á tímabilinu. Búist er við því að KB banki gangi frá kaupunum á FIH í byrjun september. Líklegt er að samstæðuuppgjör verði gert frá fyrsta júlí og rekstrar FIH muni gæta að fullu í næsta uppgjöri KB banka. KB banki gefur ekki upp áætlaða ársafkomu en gera má ráð fyrir að hagnaður sameinaðs banka muni slaga í 20 milljarða króna fyrir árið 2004.