Breyta ekki bensínneyslu

Magnús Ásgeirsson hjá Essó segir að hækkun olíuverðs á heimsmarkaði hafi líklega ekki mikil áhrif á bensínkaup íslenskra neytenda. "Sjálfsagt erum við Íslendingar þannig að við búumst alltaf við því að það birti einhvern tímann upp í þessum efnum þó að það sé ekki mjög bjart í augnablikinu," segir hann. Olíuverð hefur haldið áfram að hækka á undanförnum vikum og hefur aldrei verið hærra að nafnvirði þótt það hafi farið nokkuð hærra að raunvirði í olíukreppunum í byrjun níunda áratugarins. Magnús segir að olíukreppa á borð við þá sem varð 1973 og í um áratug þar á eftir myndi ekki hafa jafnmikil áhrif nú og þá. "Það er náttúrlega svo margt búið að breytast á síðustu árum í sambandi við uppbyggingu á vélum í bílum," segir hann. Mikil aukning eftirspurnar á Kínamarkaði auk óstöðugleika í Miðausturlöndum eru helstu ástæður hækkaðs verðs á olíu en á síðustu vikum hefur óvissa um afdrif rússneska olíufyrirtækisins Yukos bætt gráu ofan á svart og kynt undir verðhækkanir. Magnús telur að hækkanir undanfarinna daga séu komnar til vegna óvissunnar um Yukos en hann segist ekki telja að sú hækkun verði varanleg þar sem hann hafi ekki trú á að olíuframleiðsla fyrirtækisins stöðvist. "Út frá mínum bæjardyrum séð þá er það ljóst að Yukos verður ekki lokað. Það verður einhver sem tekur við," segir hann.