Danir kaupa Hörpu Sjöfn

Málningafyrirtækið Harpa Sjöfn hefur verið selt til danska fyrirtækisins Flügger. Félögin hafa átt samstarf um árabil. Íslensk fyritæki hafa verið iðin við kaup í útlöndum en fátíðara er að erlend fyrirtæki fjárfesti hér á landi. Helgi Magnússon, forstjóri Hörpu Sjafnar, verður stjórnarformaður félagsins hér á landi en danskur framkvæmdastjóri, Holger Søe, mun sinna daglegum rekstri. Kaupverð er ekki gefið upp, en miðað við upplýsingar í tilkynningu til Kauphallarinnar í Kaupmannahöfn má gera ráð fyrir að kaupverðið sé nálægt sjö hundruð milljónum íslenskra króna. Helgi Magnússon segir að ekki verði gerðar grundvallarbreytingar á rekstri Hörpu Sjafnar við eigendaskiptin. "Harpa Sjöfn, áður Harpa hf., hefur átt margra ára farsælt samstarf við Flügger og við erum sannfærð um að nýir eigendur munu efla fyrirtækið og eiga gott samstarf við viðskiptavini og starfsmenn," segir Helgi. Fjölskylda Helga hefur átt 77 prósenta hlut í fyrirtækinu á móti fjölskyldu Þóru Guðrúnar Óskarsdóttur, dóttur eins stofnanda Hörpu árið 1936. Helgi segir að ekki sé sjálfgefið að menn selji svo rótgróið fjölskyldufyrirtæki. "Fyrir fimm árum hefði þetta líklega ekki komið til greina. Tímarnir breytast og mikil viðskipti eru með fyrirtæki bæði innan lands og utan." Hann segir að Harpa Sjöfn verði nú eignarhaldsfélag og búast megi við að félagið taki þátt í ýmsum fjárfestingum í framtíðinni. Flügger er í grunninn fjölskyldufyrirtæki. Ulf Schnack tók við rekstri þess árið 1970 af föður sínum sem keypti það 1948. Fyrirtækið tók þá ákvörðun að verða skráð almenningshlutafélag árið 1983 og hefur nýtt sér skráningu á markað til þess að sækja fram og kaupa fyrirtæki. Flügger er nú leiðandi fyrirtæki á Norðurlöndunum í sölu málningavara. Útrás fyrirtækisins hefur verið stýrt af Sören P. Olesen aðstoðarforstjóra. "Flügger hefur mikla trú á möguleikum Hörpu Sjafnar til vaxtar. Fyrirtækin tvö hafa átt náið samstarf í meira en 10 ár. Harpa Sjöfn hefur um árabil selt vörur frá okkur og notar litakerfi Flügger. Með kaupunum munum við styrkja enn frekar stöðu okkar á Norðurlöndunum sem leiðandi fyrirtæki á sviði framleiðslu og sölu á málningarvörum. Við sjáum fyrir okkur góð samlegðaráhrif af kaupunum og þau eru í samræmi við markmið fyrirtækisins um vöxt á Norðurlöndunum," segir Søren P. Olesen, aðstoðarforstjóri Flügger-samstæðunnar.