Sigurður valinn maður ársins

Sigurður Helgason, forstjóri Flugleiða, hefur verið útnefndur maður ársins í íslensku atvinnulífi. Það er tímaritið Frjáls verslun sem stendur fyrir valinu. Í tilkynningu frá tímaritinu segir að hann hljóti verðlaunin fyrir einstaka hæfni við stjórnun félagsins. Í tilkynningunni er rakinn árangur í rekstri Flugleiða á yfirstandandi ári en útlit er fyrir að afkoma fyrirtækisins verði betri en nokkru sinni fyrr. Vakin er athygli á því að þetta á sér stað samtímis því að flest flugfélög heims berjast í bökkum. Á þessu ári hefur Flugleiðir einnig hafið útrás og keypti ríflega tíu prósenta hlut í breska flugfélaginu EasyJet. Sérstaklega er getið um þátt Sigurðar og Flugleiða í fjölgun ferðamanna. Þegar hann tók við sem forstjóri Flugleiða árið 1985 var árlegur ferðamannafjöldi hingað til lands um 85 þúsund en verður yfir 360 þúsund í ár.