Landsbankinn orðaður við Írland

Breska blaðið Times telur að Landsbankinn sé líklegastur til þess að kaupa National Irish Bank á Írlandi. Times segir að á miðvikudag muni koma í ljós hvaða norræni banki muni vera í viðræðum við Natonal Australian Bank um kaup á eignarhlut í írska bankanum. Times veðjar á Landsbankann sem muni hugsanlega njóta stuðnings KB banka við kaupinn. KB banki hefur eftir heimildum Times ekki hug á að kaupa írska bankann. Samkvæmt heimilidum Fréttablaðsins er Landsbankinn ekki í viðræðum um kaup á írska bankanum. Í herbúðum Landsbankans er líklegasta skýring fréttarinnar talin sú að nafn bankans hafi komið upp í viðræðum um kaup á fjármálafyrirtækjum, síðast verðbréfafyrirtækinu Numis. Þrálátur orðrómur er um að Landsbankinn leiti fjármálafyrirtækja, bæði í Bretlandi, á Norðurlöndunum og í Lettlandi, þar sem talið er að áhugi sé á Parex-bankanum í Riga. Ekkert mun þó enn sem komið er fast í hendi um hugsanleg kaup bankans erlendis, en stjórnendur og eigendur bankans hafa lýst því yfir að hugað sé að vexti erlendis.