Vodafone og OR í samstarfi

Fjarskiptafyrirtækið Og Vodafone, móðurfélag Norðurljósa og Fréttar, hefur keypt hlut Orkuveitu Reykjavíkur í Línu.neti og Orkuveitan hefur keypt ljósleiðarakerfi Og Vodafone. Samningurinn um viðskiptin var undirritaður síðdegis á föstudag. Í frétt frá Og Vodafone segir að samningurinn feli í sér stóraukna ljósleiðaravæðingu heimilanna og bættan gagnaflutning fyrir fyrirtæki. Orkuveita Reykjavíkur mun byggja upp fjarskiptanetið en Og Vodafone einbeitir sér að smásölu þjónustunnar. Í tilkynningunni er haft eftir Eiríki Jóhannessyni, forstjóra Og Vodafone, að útsendingar á sjónvarpsefni, sem nú er í gegnum ADSL, fari í gegnum ljósleiðarakerfið innan skamms. Í samkomulagi Orkuveitunnar og Og Vodafone er einnig kveðið á um að fyrirtækin muni í sameiningu vinna að þróun á gagnaveitum fyrir heimili.