Grunur um bókhaldssvik

Hlutabréf ítalska verktakafyrirtækisins Impregilo, sem er aðalverktaki Landsvirkjunar við Kárahnjúka, féllu um 37,5 prósent í gær í kjölfar rannsóknar yfirvalda á meintum bókhaldsbrotum fyrirtækisins. Impregilo er sakað um að hafa rangfært 296 milljón evra lán, 26 milljarða króna, til dótturfélags síns Imprepar sem er í gjaldþrotameðferð. Rannsókn yfirvalda beinist einnig að rangri upplýsingagjöf til markaðar. Samkvæmt ítölskum fjölmiðlum færði Impregilo lánið til gjalda fyrir gjaldþrot Imprepar. Rannsóknin beinist að því hvort peningar hafi raunverulega farið á milli fyrirtækjanna eða hvort um bókhaldssvik sé að ræða. Imregilo er að stórum hluta í eigu Romiti-fjölskyldunnar í gegnum eignarhaldsfélag hennar, Gemini. Gemini er einnig skráð á markað og hafa bréf félagsins fallið um hátt í 20 prósent síðustu tvo daga. Ítalska dagblaðið Repubblica segir að þetta sé mikið áfall fyrir ítalskt viðskiptalíf og óttast að annað mál í líkingu við Parmalat-hneykslið sé í uppsiglingu. "Þetta hefur engin áhrif á starfsemi Impregilo hér á landi og snertir á engan hátt verkefni þeirra á Kárahnjúkum," segir Ómar R. Valdimarsson, upplýsingafulltrúi Impregilo hér á landi. Impregilo segir í yfirlýsingu að umfjöllun fjölmiðla af málinu hafi verið villandi. Rannsókn beinist einungis að örfáum færslum sem rannsakendur eigi eftir að fá staðfestar. Forsvarsmenn segjast munu leggja fram gögn til rannsóknaraðila sem sýni að allar yfirlýsingar um fjárhagslega stöðu fyrirtækisins hafi verið réttar og að viðskiptin við dótturfélagið Imprepar hafi verið með eðlilegum hætti. Samkvæmt heimildum úr herbúðum Impregilo eru aðstandendur fyrirtækisins afar undrandi á rannsókninni og geta ekki varist þeirri hugsun að annarleg sjónarmið ráði rannsókn yfirvalda.