Ólíklegt að aðrir keppi

Fyrstu viðbrögð norskra fjölmiðla við kaupum Íslandsbanka á BNbank í Noregi voru tortryggni um að verðið sem Íslandsbanki bauð væri nógu hátt. Norskir fjölmiðlar gerðu því skóna að hugsanlega væru aðrir til að bjóða hærra verð fyrir norska bankann. Meðal þeirra sem nefndir voru sem hugsanlegir kaupendur voru KB banki og Danske bank. Hvorugur þessara banka vill kannast við áhuga á BNbank. Þessar vangaveltur urðu til þess að bréf bankans hækkuðu á markaði þegar spákaupmenn veðjuðu á að tilboð í bankann myndi hækka. Nú ríkir meiri óvissa um framhaldið og norskir fjölmiðlar hafa það eftir sérfræðingum að líklegast sé að aðrir en Íslandsbanki verði ekki til þess að bjóða í bankann. Verð bankans á markaði er enn hærra en tilboð Íslandsbanka hljóðar upp á. Væntingar virðast því vera til þess að boðið verði hækkað. Tilboð Íslandsbanka hljóðar upp á 320 norskar krónur á hlut, en lokaverð í gær var 335,50 krónur á hlut. Miðað við umfjöllun norskra fjölmiðla í gær er þó óttinn við að bréfin lækki skarpt, hætti Íslandsbanki við, að verða yfirsterkari vonum um að fleiri keppi um bankann. Ef þær raddir verða háværari má búast við að líkurnar á að hluthafar taki boði Íslandsbanka aukist. Tilboð bankans stendur frá 19. nóvember og mun upp úr því verða ljóst hvort bankinn þurfi að teygja sig lengra til að yfirtaka BNbank.