Smásala vex

Smásala dagvöru var 4,4 prósentum meiri í október í ár en í sama mánuði í fyrra. Verslun með áfengi jókst um fjögur prósent og lyfsala var 4,3 prósentum meiri en í fyrra. Sigurður Jónsson, framkvæmdastjóri Samtaka verslunar og þjónustu, segir að tölurnar nú sýni að nokkur aukning sé á sölu á dagvöru á þessu ári. Hann gerir ráð fyrir að salan verði fjögur til fimm prósentum meiri en í fyrra. "Þetta staðfestir það sem við höfum verið að sjá að þegar búið er að draga frá verðbreytingar þá standa eftir um fjögur prósent. Það er því sú magnbreyting sem við erum að sjá," segir hann. Í vísitölu Samtaka verslunar og þjónustu og Gallup er sérvöruverslun ekki innifalin. Sigurður segir þó að almennt sé útlitið í verslun nokkuð gott. "Almennt eru menn nokkuð bjartsýnir til dæmis varðandi jólaverslunina," segir hann.